A semana pasada formalizouse a adhesión oficial do produto Berberecho de Noia na campaña Pescados y mariscos de España, unha iniciativa estatal posta en marcha pola Federación Nacional de Pescadores que reivindica e pon en valor as especies costeiras fóra e dentro das fronteiras do mercado español. “Trátase”, en palabras da federación, “de incentivar o coñecemento e o consumo das especies máis representativas capturadas polos pescadores de costeira e litoral de todo o ámbito estatal”. Neste catálogo excelente de produtos figura oficialmente, por dereito propio, o berberecho da ría de Noia.
No acto estiveron presentes, Santiago Cruz, patrón maior da Confraría de San Bartolomé de Noia, os patróns maiores de Muros e Ribeira e o presidente da Federación Española de Confrarías.
O acto de reivindicación do berberecho local foi presidido pola concelleira de Comercio Laura Salgado García e o alcalde Santiago Freire, quen salientou positivamente a iniciativa e “o magnífico labor desenvolvido pola Confraría de Noia e os mariscadores e mariscadoras que realizan esta importante actividade económica para a nosa localidade”.
