A agrupación SumaRibeira informou hoxe do seu apoio ás concentracións mobilizadas para esixir á Consellería de Educación que se dote aos centros de ensino dos recursos necesarios para garantir aulas seguras fronte á COVID-19. En palabras da plataforma cidadá que coordina Xurxo Ferrón, a Xunta debe “garantir que se ofreza una educación de calidade coas máximas garantías fronte á pandemia, e equipar os centros co profesorado e co persoal non docente necesarios para asegurar a correcta atención ao alumnado, mantendo as distancias de seguridade recomendadas polas autoridades sanitarias”.
Asemade, súmase ás reivindicacións para requirir un reforzamento dos equipos de limpeza e se garanta a desinfección dos centros educativos, para que se asegure a educación en igualdade de condicións en caso de ter que recorrer a modelos de educación a distancia (teleformación para todas e todos) e para que sexa a Administración quen asuma as responsabilidades que lle corresponden sen trasladalas aos equipos directivos.
Asemade, a agrupación insta ao Concello de Ribeira a que convoque, “á maior brevidade posíbel”, o Consello Escolar Municipal para “que colabore e coordine a toma de decisións para garantir a seguridade de todas as comunidades escolares do termo municipal”. Por todos estes motivos, SumaRibeira convida á cidadanía a participar na concentración que terá lugar mañá mércores, día 17 de setembro, ás 19:00 h na praza do Concello de Ribeira.
