O Goberno municipal da Pobra de Caramiñal emitiu este martes 29 un comunicado oficial a respecto da sesión plenaria extraordinaria do pasado 1 de outubro e co ánimo de “retomar as conversas de cara a un acordo de goberno”.
Este é o comunicado da executiva do Concello, no que se reflicte a súa vontade de facer fronte común coas fileiras do BNG local:
“Consideramos que a convocatoria e celebración da sesión plenaria extraordinaria do pasado 1 de outubro, na que se aprobou a dedicación exclusiva da concellería de Servizos Municipais e a contratación dun posto de persoal eventual, foi un erro que supuxo a ruptura das xa moi avanzadas conversas entre as dúas asembleas. A maioría circunstancial empregada, aínda que legal, non representaba o sentir democrático expresado nas urnas pola veciñanza da Pobra.
Por todo isto, recoñecendo dito erro, amosamos a nosa intención de comezar de forma urxente e partindo de cero as negociacións coa asemblea local do BNG, co obxectivo de chegar a un acordo para a participación do BNG no Goberno municipal”.
