A longametraxe galega María Solinha proxectarase na Pobra do Caramiñal, da man do Concello e a Deputación da Coruña. Será no domingo 27 de setembro, ás 20.00 horas, no Elma. Producida por Vía Láctea Filmes e Televisión de Galicia (TVG), o filme foi dirixido e escrito por Ignacio Vilar (A Esmorga, Sicixia), quen quixo reivindicar o carácter libre e loitador de María Solinha, unha senlleira e histórica muller galega que foi perseguida polo poder político e a Igrexa após desafiar o sistema estabelecido.
O evento constará da presentación do filme coa presenza do director, Ignacio Vilar, e organizarase un coloquio posterior coas persoas asistentes.
A cabida do local estará limitada para seguir as medidas de seguridade implantadas por mor da COVID-19. Por iso, a entrada, se ben gratuíta, será pola orde de chegada ó teatro cine Elma.
Respecto do argumento en si mesmo da longametraxe, nárranos a chegada a Cangas dun afamado director que ten o proxecto de reconstruír no teatro a historia de María Solinha, acusada de bruxería e queimada pola Inquisición no século XVII. A protagonista da obra de teatro vai sufrir, no século XXI, acedos ecos da agresión que sufriu María Solinha no século XVII. O filme está interpretado por Grial Montes, Laura Míguez, Santi Prego, Mabel Rivera e Antonio Durán “Morris”. O guión é de Esther F. Carrodeguas, Ermel Morales e Ignacio Vilar.