A Concellería de Deportes do Concello de Rianxo vai pór en marcha entre os clubs locais unha campaña de apoio aos seus patrocinadores e, “por extensión”, ao comercio e industria locais. A iniciativa, que está a coller corpo baixo o lema En liña pola vitoria, grazas a ti – Mercando no comercio, contou dende o primeiro intre co apoio das entidades deportivas locais, segundo salientou o Concello, xa que lles permite “devolver dalgún xeito o apoio que reciben das empresas, sen o cal sería moi difícil que levasen a cabo súa actividade deportiva”.
O obxectivo é, en palabras do departamento de Deportes, “poñer un grao de area desde o deporte rianxeiro para fomentar o consumo local e que a poboación se conciencie de que ese apoio revirte na sociedade rianxeira a través, entre outros sectores, do deporte”.
O Concello tamén quere poñer o foco no feito de que todos os clubs rianxeiros participen nesta campaña, para a que se elaborou un vídeo a subir online con todas as modalidades deportivas e os seus patrocinadores principais. Tamén hai carteis e imaxes para compartir en redes sociais nas que se convida á cidadanía a que aposte polo comercio local a través das súas compras.
A campaña iniciarase mañá sábado, ás 12 h., nas redes sociais da Concellería de Deportes e de todos os clubs rianxeiros.
