O Concello da Pobra mellora as condicións de vida das colonias de gatos

02 Setembro 2020

O Concello da Pobra, a través da Concellaría de Benestar Animal, leva un tempo impulsando accións para asegurar o benestar dos animais, concretamente nas colonias locais de gatos, poñendo en xogo medidas para controlalas e mantelas nunhas axeitadas condicións sanitarias.

As actividades, que se están a levar a cabo en colaboración coa Protectora Moura e da Protección Civil, complementan a metodoloxía CES (captura, esterilización e solta) con labores de desparasitado e de revisión chequeo veterinario. Esta liña de traballo comezou hai un ano facendo fincapé nos grupos de gatos e gatas sen fogar e abordando un rexistro pormenorizado sobre as colonias.Unha das últimas intervencións consistiu na colocación de gaiolas con comedeiros e gateiras na praza da Treixadura e na rúa Condado, ademais de carteis informativos. Segundo informa o Concello, trátase dunha proba piloto que busca “nutrir adecuadamente os felinos mediante penso repartido por persoas pertencentes ao voluntariado”, e facelo ademais “de xeito ordenado”.

Ao mesmo tempo, a Concellería e a Protectora Moura contribúen a mellorar a salubridade dos lugares das colonias ao non depositarse residuos orgánicos para a alimentación dos gatos e gatas, unhas tarefas que deron “bo resultado” e que se prevé que teñan continuidade con máis gaiolas noutros puntos do termo municipal.

Outra das actuacións foi o fornecemento dun refuxio de madeira para felinos na praza da Treixadura, co obxectivo de achegar aos animais un acubillo alternativo aos baixos dos vehículos e aos portais das casas, ao mesmo tempo que se contribúe a mellorar a convivencia coa veciñanza. O Concello explica que o carpinteiro municipal encargouse da construción da caseta, polo cal tan só supuxo un custo de 150 euros correspondente ao material empregado.

Por outra banda, o Goberno local engadiu que se está a dotar de mobiliario a praia canina que comprende o último tramo dos Areos, en dirección ao Maño. Así, establecéronse papeleiras que conteñen dispensadores de bolsas para excrementos, unha fonte canina e un novo cartel informativo.

Outros artigos

Barbanza Arousa recibe as primeiras adhesións ao SICTED

A Mancomunidade Barbanza Arousa, en consonancia coa súa estratexia de colaboración público-privada, continúa este ano coa implantación do Sistema Integral de Calidade Turística en Destino, SICTED, entre os axentes turísticos do territorio. Nesta ocasión, a primeira...

+

Publicidade

Revista en papel

Opinión

“Celebrando a  Rosalía de Castro”. Antía Pereira

“Celebrando a Rosalía de Castro”. Antía Pereira

“Celebrando a Rosalía e o seu día celebramos o que nos une, o que nos representa e o que nos move. Poucas figuras concitan ó seu redor a unanimidade que convoca Rosalía. E iso en boa medida porque ela soubo tocar as cordas, unha a unha, aínda que fose de distinto...