Un vehículo ardeu completamente pasadas as 11 da mañá en pleno centro urbano de Ribeira. O coche conducido por unha muller empezou a botar fume polo motor e en poucos minutos queimouse completamente. O lume foi acompañado por pequenas explosións o que alarmou ós transeúntes. De establecementos cercanos acudiron persoas con extintores pero a rapidez do incendio non logrou evitar que quedara completamente calcinado. Trátase dun Citroen con matrícula nova de apenas 20 días. A conductora sufriu un ataque de pánico ante a situación completamente inexperada.
Inmediatamente acudiron ao lugar os vehículos de emerxencia (GAEM, Policía Local,Policía Nacional, Policía Portuaria e Bombeiros de Ribeira). Afortunadamente, non houbo que lamentar danos persoais nin foi preciso que concorrese ningunha ambulancia do 061, aínda que o incendio si ocasionou danos materiais en dous vehículos aparcados nas inmediacións. Foi preciso desviar o tráfico polo carril interior do porto e pola rúaCanarias en tanto se desenvolveron os labores de control da situación e posterior limpeza.
