As entidades Fundamar (Fundación para a Pesca e o Marisqueo) e Funpromar lanzaron estes días o portal do seu proxecto Sereas, www.sereasdomar.org, a vertente máis tecnolóxica dunha iniciativa divulgativa encamiñada, nas súas palabras, “a descubrir, transmitir e valorizar o papel da muller no sector pesqueiro e conserveiro”.
O proxecto Sereas comezou en 2017 da man das ditas entidades, poñendo en xogo unha marca que adica esforzos a visualizar o traballo das mulleres vencelladas ao mar, “unha parte esencial do patrimonio inmaterial do sector”, explican.
O Ministerio de Cultura e Deporte, a través da convocatoria de axudas para proxectos de salvagarda do Patrimonio Cultural Inmaterial, apoiou a iniciativa de desenvolver o portal dixital de Sereas para a súa difusión e dinamización.
Amais dos devanditos obxectivos, co sitio en liña acabado de estrear búscase reflictir “as historias das mulleres” ao tempo que se contribúe a proporcionar “fontes sólidas de información para configurar a historia esquecida, compondo personaxes para recuperar a memoria do traballo feminino desde o pasado até a actualidade”.
O portal será presentado de maneira oficial nunha xornada a finais do mes de outubro.
