CONGALSA dá un salto adiante en capacidade frigorífica

A Corporación Empresarial CONGALSA, con sede principal na Pobra do Caramiñal, vén de informar do “importante salto cualitativo” que vén de dar o grupo en capacidade frigorífica tralo investimento de máis de dous millóns de euros en ampliar as instalacións de Fricosim, no Polígono da Tomada (A Pobra).

Segundo fixo saber CONGALSA, a previsión é que as novas dependencias, operativas dende principios da semana pasada, “alcancen o seu máximo de ocupación entre setembro e outubro grazas aos diferentes compromisos xa adquiridos coas empresas do Barbanza ás que dará servizo”.

A ampliación de Fricosim permitiu habilitar unha nova cámara frigorífica, cun volume de frío de 18.200 metros cúbicos. Con esta obra, a capacidade total das instalacións frigoríficas de Fricosim (en Ribeira e na Pobra do Caramiñal) ascende a 59.780 metros cúbicos.