Un total de catorce alumnos do obradoiro de emprego de cociña do Concello de Ribeira participaron este venres 4, nas primeiras horas da mañá, nunha nova visita á Lonxa de Ribeira, co obxectivo de afondar no seu coñecemento acerca da rula local, logo da súa estadía do pasado 28 de xullo. Os asistentes ao obradoiro, que estiveron acompañados por tres membros do persoal técnico (a directora do obradoiro Almudena Basoco, o profesor Patxi Movilla e a titora Estela Saa), asistiron en primeiro lugar á descarga de xurelos por parte dos barcos do cerco e outros buques de pesca.
Así mesmo, aproveitaron para coñecer as instalacións que dentro da rula posúe Pescados Paco, que conta con varios viveiros con centolas, bois, lumbrigantes, cigalas, etc., e observaron in situ o funcionamento dos mesmos. Aínda que estaba previsto entrar na sala de poxas optaron finalmente por non facelo para non entorpecer o labor dos profesionais que traballan nas subastas.
