A Asociación Cultural Barbantia, Urutau Editora e a Concellería de Cultura do Concello de Ribeira van organizar a vindeira semana a presentación do libro Náufragas no mar e na terra, da poeta Elisabeth Oliveira. Concretamente, a cita será o venres 11 de setembro ás 20.30 h na sala de conferencias do Centro Cultural Lustres Rivas de Ribeira (rúa Manuel Lustres Rivas, 2º andar).
Intervirán no acto a propia autora, Encarna Pego (Asociación Cultural Barbantia), Antonio Piñeiro (Barbantia) e Mariola Sampedro (concelleira de Cultura). O acto será de asistencia libre (até completar aforo previa inscrición en pastor@barbantia.es) e será obrigatorio o uso de máscara.
Elisabeth Oliveira é unha poeta de orixe portuguesa nacida en Francia e afincada en Galicia. Comezou a súa andaina literaria con Poesis no ano 2016 e agora está a presentar Náufragas no mar e na terra, unha reivindicativa proposta a prol da xustiza, o respecto polas/os demais e a igualdade.
