Adxudicada a habilitación na Fieiteira (Ribeira) do circuíto de pump track

O Concello de Ribeira adxudicou a instalación do circuíto de pump track previsto para o complexo da Fieiteira, así como outras melloras para este espazo. No que se refire ao citado circuíto (concibido co propósito de poder ser percorrido completamente cun monopatín ou bicicleta sen necesidade de impulsarse cou pé ou cos pedais, senón mediante a inercia adquirida nos saltos e peraltes do mesmo) a empresa que acadou a mellor clasificación foi Construcciones Anspal, S.L., cunha oferta de 37.510 euros, IVE incluído.

De acordo co proxecto elaborado, o circuíto disporase nunha superficie de 800 metros cadrados. O Concello especifica que o trazado contará “cun trazado semellante a un búmerang” con curvas comprendidas entre 70º e 170º e “cinco rectas definidas por distintos obstáculos ata sumar unha lonxitude de corda total de 100 metros”. Todo o percorrido manterá unha anchura de 1,80 metros.

As obras necesarias inclúen a limpeza e nivelación do terreo, canalizacións de auga, perfilado de obstáculos, revisión e proba do circuíto en terra, asfaltado, sinalización e acabado de zonas internas do trazado.

Outras melloras

A mesma licitación incluía tamén outras obras mellora no vestiario do Campo de Fútbol da Fieiteira, na terraza situada enriba da sauna (coa fin de impermeabilizala e evitar posíbeis filtracións de auga) e no almacén situado nas inmediacións da pista de atletismo (reformarase tanto a cuberta como o chan e as paredes interiores).

Para este lote tamén foi Construcciones Anspal a empresa mellor clasificada, cunha oferta de 29.645 euros, IVE incluído.

O conxunto da actuación conta cunha achega procedente de Vicepresidencia e Consellería de Presidencia, Administracións Públicas e Xustiza, ao abeiro da orde de 12 de decembro de 2020 pola que se establecen as bases reguladoras e se convocan as subvencións para a creación ou mellora das infraestruturas, dotacións, instalacións e equipamentos vinculados á prestación de servizos municipais, destinadas a concellos de Galicia para o ano 2020.