O Concello de Ribeira e a Fundación Manuel María de Estudos Galegos veñen de selar un convenio en virtude do cal a primeira das entidades convértese en colaboradora da segunda edición do Certame Manuel María de Proxectos Teatrais. Isto implica que o novo espectáculo que resulte gañador na presente edición do concurso (baseado nunha obra do escritor chairego que dá nome ao premio) recalará en Ribeira en 2021 ou 2022, coincidindo co período de vixencia desta convocatoria de carácter bienal.
Como compromiso do Concello figura a achega dunha contía non superior aos 2.700 euros e que se corresponderá co caché dunha función da obra que resulte galardoada.
O Concello salientou que na primeira edición a peza elixida foi O meu mundo non é deste Reino. Farsa de Bululú dirixido por María Peinado a cargo de Anxo García e Fran Lareu, de Teatro do Andamio, representada en decembro de 2019 no marco da Mostra de Teatro de Ribeira.
