A Asociación de Nais e Pais do CEIP de Palmeira vén de emitir un comunicado de protesta polo estado no que se atopa o centro educativo, un estado que a ANPA cualifica de “terrible situación” por mor dos traballos de acondicionamento e reparación que se están a desenvolver nas súas dependencias.
Segundo fai saber o colectivo de nais e pais, as obras que se realizan para acondicionar o colexio “resultan aínda máis perigosas para as nosas fillas e fillos que a propia COVID”. A ANPA engade que lle resulta “inadmisible” que se teña que volver ás clases esta semana, malia o estado no que se atopa o centro.
A asociación lembra que a Consellería de Educación negouse a aprazar a data do inicio, unha petición emitida pola dirección do CEIP, preocupada polo estado das instalacións, pois “non pode garantir un entorno seguro para o alumnado, e que a Consellería insiste en rexeitar”, explica a ANPA nun comunicado.
Segundo fan saber as nais e os pais, os docentes tamén expresaron a súa inquietude pola “imposibilidade de facer o seu traballo, pois non poden ni sequera poñer mesas nas aulas (sexa á distancia que sexa)”.
O colectivo, como representante dos pais e nais do alumnado do Colexio de Palmeira, recordan no comunicado que “non pode permitir que os escolares entren no recinto nas actuacións condicións nas que se atopa”.
A xunta directiva da ANPA enviou unha carta á Consellería manifestando a súa negativa de levar aos nenos a “un colexio con serios problemas para garantir a súa seguridade”. Polo tanto, solicitan un aprazamento “ata que as obras rematen e sexa posible facer uso das instalación e a aplicación dos protocolos COVID aprobados polo centro escolar”.
