Boiro ferve estes días de actividades culturais para veciños e residentes de todas as idades, con variedade de formatos pero co nexo común, todas as citas, de garantir a seguridade sanitaria dos asistentes. A axenda colle impulso este mércores 5 de agosto, coa celebración dun espectáculo de narración oral coa contadora Raquel Queizás. Trátase de Romaría: Contos e lendas da nosa terra. Será unha cita moi indicada para o público infantil e familiar. Celebrarase nos muíños do paseo do río Breiro, a partir das 12.00 horas. Pódese reservar a entrada no enderezo electrónico cabodecruz@boiro.org ou no mesmo día da actuación, por orde de chegada, até completar o aforo.
Este mesmo mércores, tamén haberá marxe para o circo. Será na praza da Agramuíña, diante do Centro Social de Escarabote, da man de Isla Le Triska. As prazas para o espectáculo, previsto para as 21.00 horas, pódense solicitar no devandito correo electrónico, ou no mesmo día da actuación, por orde de chegada, até completar o aforamento.
O venres 7 de agosto prosegue a festa circense no paseo marítimo de Barraña, ás 21.00 horas, cos Desastronauts (humor ingrávido para facer voar a imaxinación), o dúo circense formado por Raquel Veganzones e Girisho Gordon, con sede principal de operacións en Santiago (achegando espectáculos de acrobacias que destacan pola mestura de “risco, innovación, humor, orixinalidade, calidade e, sobre todo, falta absoluta de vertixe”). As entradas para o seu espectáculo Máis alto aínda poderán reservarse no enderezo cabodecruz@boiro.org ou no mesmo día de actuación, por orde de chegada, até completar aforo.
O programa seguirá subindo en intensidade os días seguintes co teatro-comedia para público infantil e familiar de Galeteatro (Muiñada, o sábado 8 ás 12.30 horas). Será nos muíños de ponte Goiáns. As entradas para o espectáculo, moi axeitado para a rapazada de máis de 5 anos, poderán reservarse tamén na devandita conta de correo electrónico ou no mesmo día da actuación, por orde de chegada, até completar aforo. O espectáculo inclúe unha visita guiada aos muíños de ponte Goiáns, que sairá da praza de Galicia de Boiro ás 11.45 horas.
