Con motivo da estancia en Sálvora de seis alumnos do taller de carpintería do Servizo de Drogodependencias de Ribeira, os concelleiros de Servizos Sociais e Promoción e Dinamización Económica, Ana Ruiz e Ramón Doval, desprazáronse ata a illa para observar in situ a evolución dos traballos que estes alumnos están a realizar a prol da comunidade e que serva ao mesmo tempo como unha actividade terapéutica e inclusiva para o seu beneficio.
Así, logo de que fai uns días se ocuparan de construír unha nova escaleira para a praia do Almacén, nestes momentos están elaborando unha trintena de carteis en madeira tallada destinados a mellorar a sinalización en diversos enclaves deste territorio enclavado no Parque Nacional Marítimo-Terrestre das Illas Atlánticas. Tales labores deron pé a que os visitantes tivesen ocasión de transitar por lugares como a aldea, o faro ou o pazo de
Sálvora.
Na viaxe participaron tamén dous representantes do obradoiro de cociña O Pote que se están a encargar de preparar os menús cos que se están alimentado os usuarios da UAD (tamén está o seu profesor Manuel Casais). En concreto, a directora do taller Almudena Basoco e o profesor Patxi Movilla acudiron ata illa cunha nova remesa de alimentos preparados.
Cómpre lembrar que nas súas estancias na illa nos tres anos anteriores os usuarios do taller de carpintería ocupáronse de restaurar unha dorna e dunha embarcación auxiliar e dunha calesa: tres dos elementos que se exhiben no Pazo de Sálvora.
