Unha traballadora da residencia Volta do Castro de Santiago de Compostela deu positivo en coronavirus polo que o Servizo Galego de Saúde procedeu a realizar probas ao resto de persoal e aos usuarios.
Segundo informaron fontes da área Sanitaria de Santiago, un equipo de profesionais de enfermería desprazouse á residencia para realizar PCR a “131 residentes e 162 traballadores” tras o coñecemento deste caso positivo. Con este novo caso, os usuarios e traballadores de residencias infectados con COVID-19 en Galicia seguen en 86 este luns. Do total, 67 son usuarios e 20 son traballadores.
Datos actualizados esta tarde na área sanitaria Santiago- O Barbanza:
- Santiago. Residencia Volta do Castro. Un equipo de profesionais de enfermería desprazouse hoxe á residencia de maiores volta do Castro en Santiago para realizar PCR a 131 residentes e 162 traballadores tralo coñecemento de 1 positivo, hoxe, dunha traballadora.
- 11 novos positivos detectados tralo estudo de contactos do screening realizado nos mozos do SAP de Melide.
No resto de Galicia os datos das consellerías de Sanidade e Política Social emitidos este luns, mostran que o centro residencial da Fundación San Rosendo mantense en 64 casos, dos que 56 son usuarios e oito empregados. Este último parte inclúe o primeiro usuario infectado na residencia DomusVi de Lalín (Pontevedra), xa coñecido o domingo. Ademais, hai dous traballadores positivo por COVID-19. Os 67 usuarios con coronavirus complétanse cos 10 existentes na residencia Orpea de Culleredo (A Coruña). Aquí, tamén segue estable o número de casos en traballadores, con catro Ademais dos oito traballadores afectados no Incio, os dous de Lalín e estes catro en Culleredo, hai un caso en cada unha das seguintes residencias de maiores: DomusVi de Monforte; Paradela; San Bartolomeu de Xove; e DomusVi de Barra de Miño, no municipio ourensán de Coles. Tamén suma a estes casos o dun traballador da residencia de discapacitados de As Flores, en Ourense, e o de Volta do Castro, en Santiago.
