Continúan os roteiros de O Son Camiña, o programa de rutas para sendeiristas que nos leva aos moitos miradoiros que regala a Serra do Barbanza ao seu paso polo Porto do Son: balcóns naturais dende o que contemplar algunha das mellores paisaxes galegas e co engadido de facelo a pé e coas axeitadas medidas de aforamento (limitado) e control sanitario. A nova cita será este domingo 23 de agosto e lévanos ao monte Iroite.
A ruta comeza ás 9.00 horas, con saída do Bar Mambols, e terá 18 quilómetros de percorrido e un nivel de dificultade a ter en conta polos participantes potenciais: dificultade moi alta. O límite de prazas é de 60. Quen queira inscribirse na experiencia pode facelo a través do correo osoncamina@gmail.com, indicando nome, apelidos, teléfono e número de DNI. Segundo lembra o Concello de Porto do Son, será obrigatorio o uso de máscara de protección.
Polo que respecta ao “contido” da andaina, levaranos, en palabras da organización, “a un dos carreiros con mellores vistas e de maior altitude do concello”. A camiñada comeza nas proximidades da praia de Aguieira, levando aos participantes aos pasais da aldea de Queiro (que cruza o río Cans) e logo aos núcleos de Resúa e Pedra do Lobo, “desde onde ascenderemos ata un camiño que discorre case a nivel pola parte alta da ladeira do monte Iroite”. A baixada ofrecerá unha inmellorábel oportunidade para “gozar da preciosa paisaxe chegando á parte máis baixa da ruta onde se atopan varios petróglifos”.
