O campamento de conciliación que se desenvolve no CEP Salustiano Rey Eiras da Pobra e no cal participan 40 crianzas seguirá funcionando até o día antes do inicio do curso escolar, ou sexa, até o 9 de setembro. Así o fixo saber hoxe o Concello, engadindo que se trata do quinto ano en que se presta este servizo a través da Concellaría da Igualdade, unha iniciativa para as familias que tamén inclúe servizo para madrugadores e comedor.
Ata alí desprazouse hoxe a edil da Igualdade, Charo Varela, para, xunto ao coordinador, Rubén López, explicaren o propósito do campamento, o cal durante todo o verán contou con 65 nenos e nenas, sen se limitar unicamente á localidade, pois tamén poden facer uso del familias de municipios limítrofes e, incluso, aquelas que veñan gozar da comarca na época estival.
Xunto coas cinco monitoras e o coordinador, os cativos e cativas, con idades comprendidas entre os 3 e 12 anos, desenvolven diversas actividades cunha vertente educativa e lúdica adaptada a cada rango de idade. Por exemplo, no día de hoxe estiveron divertíndose da man de Troskita. Seguindo o protocolo de seguridade establecido por mor da COVID-19, emprégase en todo momento a máscara e mantense a separación.
