A Biblioteca Municipal de Ribeira vén de recibir un libro realizado por dous integrantes da Asociación Corrubedo XI Séculos, Fernando Vilariño e Francisco Sánchez Fraga, que rescata o naufraxio no outono de 1959 do iate
inglés Debonair, así como a heroica actitude dos veciños do pobo ao amparar aos náufragos (un matrimonio e un fillo pequeno), motivo polo que foi distinguido coa única medalla de prata a título colectivo concedida pola Sociedade Española de Salvamento de Náufragos.
Titulado “El naufragio del Debonair” e con 170 páxinas, comprende unha ampla recompilación de documentos antigos, textos, telegramas, fotografías e recortes de prensa, amén de crónicas actuais sobre os feitos, cos que se rememora este mediático suceso que recibira a atención de periódicos de toda a xeografía española.
Os autores quixeron destacar a colaboración da veciñanza de Corrubedo así como a cesión de fotografías por parte da viúva de Luis de la Peña (avogado santiagués que xogou un papel importante na concesión da citada medalla) e de Kathryn Mary St Clair Davis, filla e irmá dos náufragos, que reside en Cape Cod (Estados Unidos).
Visita da neta
De feito, a publicación rememora tamén un evento recente: a visita no
inverno do ano pasado de Hanna Slater, filla de Kathryn, neta e sobriña dos náufragos, á quen se lle dispensou un emotivo acto de reencontro por iniciativa de Corrubedo XI Séculos na igrexa parroquial onde se garda a medalla (no manto da Virxe do Carme).
Todo isto está reflectido nun libro do que se imprimiron dous exemplares grazas aos servizos de encadernación da Biblioteca Municipal. A concelleira de Educación de Ribeira, Juana Brión, acompañada do arquiveiro municipal José Antonio Otero e do bibliotecario Xoán Fernández, foi a encargada de recibir os mesmos.
Xa poden ser consultados por calquera usuario da biblioteca interesado en coñecer a historia de Corrubedo.
