A estrea da nova curtametraxe da produtora Vou Films, vai celebrarse este sábado 5 de setembro no cine Elma, na Pobra do Caramiñal a partir das 20.30 horas. Baixo o título As peixeiras aborda as vidas e os traballos deste colectivo profesional na época da posguerra e continúa a saga de óptica feminina iniciada con As lavandeiras e seguida por As costureiras. Ao acto de presentación asistiron o alcalde Xosé Lois Piñeiro, a concelleira da Cultura, Patricia Lojo, o director e guionista do filme, Lois Basallo, e a responsábel de produción, Adrianna Rego.
Na súa intervención, Basallo indicou que este é o terceiro proxecto de seis que teñen previsto desenvolver e que se gravou ao 90% na localidade da Pobra, afondando “nun tema moi noso, tan galego, que está vencellado ás mulleres que dentro da propia familia axudaban aos mariñeiros”. Así mesmo, anunciou que o próximo filme será As leiteiras.
Debido á situación que estamos vivindo, será preciso reservar entrada, tal e como explicou Adrianna Rego, a través do teléfono de contacto 981 831 545, de luns a venres, en horario de 19.00 a 21.00 horas.
Con motivo da limitación da cabida no Elma, o Concello non desbota a organización dunha segunda sesión para outra data por determinar. A proxección contará coa participación da maior parte do elenco de actrices e actores: Alba Bermúdez, Carlos Villarino e Uxía López. Se ben Brais Abad e Gloria Ferreiro non estarán presentes, mandarán unha mensaxe especial.
Na súa intervención, o rexedor agradeceu o traballo de Vou Films, reafirmándose en que contarán co apoio do Concello, pois insistiu na “calidade do produto” que ofrecen e en que “foron sempre un éxito rotundo”.
