Este martes 28 temos unha cita co teatro-circo para todas as idades da man da Compañía Vueltos de Rosca e o espectáculo Lila Star. Será a partir das 20.30 horas no Cantón da Leña. A principal artífice desta actividade é a actriz e clown Beatriz Rubio, criada no seo dunha familia de acróbatas de circo clásico, experta en todo tipo de técnicas circenses: acrobacia, equilibrio de mans, rola-bola, clown, etc.
Segundo se fai saber na presentación en Rede do seu espectáculo, Beatriz Rubio é unha artista branca con alma de negra, apaixonada da purpurina e obsesiva pola cor morada; que se confesa adicta ás berenxenas e que forma parte do club de fans de Deep Purple, Violeta Parra e, tamén, de Pink Floyd.
Organiza a Concellaría de Cultura da Pobra do Caramiñal en colaboración coa Rede Cultural da Deputación da Coruña.
