Quedou visto para sentenza o xuízo polo atraco perpetrado nunha gasolineira de Ribeira en xaneiro do 2019 e no que os asaltantes dispararon cunha escopeta ao empregado, feríndoo nunha perna. Mentres que os avogados dos dous imputados pediron a súa libre absolución o fiscal decidiu rebaixar a 16 anos a pena solicitada para D. G. S., veciño da Pobra de 29 anos, e P. F. M. de 31 anos residente en Ribeira.
Nun principio, pediuse para este último 21 anos de prisión, debido a que aos delitos de roubo, lesións e tenencia ilícita de arma longa, engadíase outro por estar en posesión dunha pistola sen ter permiso, o que sumaba 24 meses máis de cárcere. O Ministerio Público reduciu de nove a seis anos a petición que fixo para ambos polo delito de lesións.
O suceso aconteceu o ano pasado cando o empregado da gasolineira Agro do Forno, situada en Ribeira, resultou ferido de gravidade ao ser alcanzado por un disparo nun atraco. Segundo a investigación, dous homes encapuchados, que chegaron ao lugar en moto, dispararon cun arma de fogo ao home. Os atracadores entraron na tenda e fixéronse coa caixa e diferentes obxectos.
Primeiro apropiáronse dunha moto nun garaxe e logo utilizárona para desprazarse ata a zona de Oleiros e atracar a gasolineira, na que dispararon cunha escopeta ao empregado de 22 anos, para logo roubarlle, levar a caixa rexistradora e deixalo alí tirado.
O xuizo tivo lugar na Audiencia Provincial onde compareceron polos feitos ocorridos o 17 e o 19 de xaneiro do 2019.
O traballador tivo que ser operado en catro ocasions e ten importantes secuelas permanecendo de baixa.
