O programa Verán Cultural 2020 do Concello de Boiro vai ter continuidade este venres 17, novamente reivindicando escenarios alternativos para acoller espectáculos e formatos reducidos e íntimos para asegurar a máxima seguridade. Trátase dunha nova cita de narración oral, desta volta no Lavadoiro de Revelar: As lavandeiras, con Vero Rilo e Sonsoles Penadique. Comezará ás 21.00 horas no devandito lavadoiro, na Boliña.
Coa programación cultural para este verán o Concello de Boiro busca revitalizar espazos do municipio que ate o de agora non se estaban utilizando para facer actividades culturais e, deste xeito, descentralizar a programación. Todos os espectáculos organízanse seguindo as medidas de seguridade e hixiene marcadas polas autoridades sanitarias para previr contaxios.
Segundo informa a Concellería de Cultura de Boiro, As lavandeiras é un espectáculo de narración oral que vai contar con música ao vivo, cantos e lendas, todos os elementos dispostos para mostrar a nosa tradición a través dun oficio tan importante como o que se levaba a cabo nos lavadoiros. O aforamento, engade o Concello, é limitado e as entradas poden reservarse a través do enderezo electrónico cabodecruz@boiro.org ou o mesmo día do espectáculo por orde de chegada.
