Este mércores 15 de xullo presentouse na antiga fábrica de Curbera, sede provisional do Club de Remo de Cabo de Cruz, a sexta edición da Bandeira de Traíñas Marina Cabo de Cruz – Concello de Boiro e a primeira edición da Bandeira Galega de Traíñas Feminina Rianxeira. Ao acto acudiron o concelleiro de Deportes, Marcos Fajardo, o presidente do Club de Remo Cabo de Cruz, Daniel Vázquez, o presidente do Náutico de Boiro – Marina Cabo de Cruz, e a directora de relacións institucionais de JEALSA, Marga Hermo. Segundo fixeron saber, as dúas probas vanse realizar o vindeiro sábado 18 de xullo, no peirao de Cabo de Cruz.
A primeira das probas en disputarse vai ser a feminina, a partir das 17.30 horas, na que compiten 6 equipos en dúas quendas, na primeira quenda Cabo, Samertolameu e Perillo; na segunda quenda Chapela, Tiran e Rianxo.
Na segunda das probas, a VI Bandeira Marina Cabo de Cruz – Concello de Boiro, compiten 12 equipos en tres quendas. Na primeira delas Bueu, Esteirana e Rianxo; na segunda Muros Tirán e Vilaxoan; e na terceira quenda Mecos, Mera, Samertolameu e Cabo de Cruz.
O presidente do Club de Remo Cabo de Cruz, Daniel Vázquez, explicou como se vai realizar a proba e mostrou o seu agradecemento ás entidades patrocinadoras.
Tamén interveu na cita deste mércores 15 a directora de relacións institucionais de JEALSA, Marga Hermo, quen mostrou o compromiso da empresa co club: “A colaboración nesta regata é moi significativa para nós porque o Club de Remo comparte valores coa empresa e, entre as liñas de traballo do grupo, está a aposta polo deporte feminino”.
O concelleiro de Deportes do Concello de Boiro, Marcos Fajardo, deulle todo o apoio ao Club de Remo de Cabo de Cruz na proba do sábado: “Estamos moi orgullosos do Club de Remo de Cabo de Cruz e dos seus éxitos, é unha prioridade da Concellería de Deportes apoiar a todas as entidades que traballan arreo pola promoción no deporte no municipio”. Fajardo animou a toda a cidadanía a “que este sábado se desprace a Cabo de Cruz para asistir a esta proba, respectando sempre as medidas de seguridade e hixiene para previr contaxios pola COVID-19”.
