A Fundación Paideia Galiza organiza no Centro Social de Boiro e na Pobra do Caramiñal un curso sobre industria musical para a produción de festivais musicais. Á presentación en Boiro da actividade, celebrada este mércores, asistiron a concelleira de Cultura, María Outeiral, o vicepresidente da Fundación Paideia, Guillermo Vergara e tamén a xerente da Asociación Deloa, Paca Gago, máis o técnico do eixo de xuventude da Fundación Paideia, Juan Soriano.
O curso, segundo fixeron saber, comeza o día 20 de xullo, en formato presencial, e rematará o vindeiro dia 3 de setembro. Trátase dunha proposta formativa de balde, co-financiada polo Fondo Social Europeo; o Ministerio de Industria e a Asociación de Desenvolvemento Local Deloa. Está destinado a mocidade de entre os 16 e os 29 anos inscritos en garantía xuvenil.
Segundo explicaron as participantes na presentación, as persoas asistentes van ter a oportunidade de aprender como se realiza todo o proceso de xestión dun evento musical, desde a programación até a contratación, incluíndo labores de difusión e mercadotecnia. Ademais, o alumnado do curso vai recibir formación individual e adquirir competencias xenéricas á hora de saír ao mercado laboral (con vistas a favorecer o seu desenvolvemento e potenciar as súas competencias individuais).
O prazo de inscrición está aberto e para participar na actividade non se require ningún tipo de formación nin coñecementos previos. Hai un máximo de 25 prazas e as inscricións poden facerse a través da web www.deloa.es e pode consultarse calquera información sobre o curso no enderezo electrónico deloa@deloa.es, o teléfono 981 817 000 ou vía Whatsapp no 606 026 202.
