O Concello de Boiro abre ao público esta semana o estacionamento municipal de A Boqueira da Negral, que foi obxecto de traballos recentes para a súa mellora. O alcalde de Boiro, José Ramón Romero, e o concelleiro de Urbanismo e Obras, Luís Ruíz, fixeron unha visita polas instalacións, este luns 20 de xullo, acompañados do xerente e directiva do para coñecer as tarefas de acondicionamento que se realizaron no inmóbel para proceder á súa apertura.
Segundo informaron, coa posta a disposición da cidadanía do estacionamento péchase un capítulo de infraestruturas municipais que foi alongado en exceso: malia terse construído como aparcamento municipal, nunca chegara a empregarse para este fin e tiña pendente a súa apertura definitiva ao público. De feito, o Concello fixo saber que “as instalacións estaban a usarse como pañol de obras e para gardar material de construción, xardinería e maquinaria de todo tipo”. O Goberno local tamén recordou que portavoz de ICBoiro, Manuel Velo Velo, foi un dos principais defensores da apertura ao publico deste emprazamento.
Amplo horario de luns a domingo
Dende este 21 de xullo o aparcamento está aberto ao público, de maneira gratuíta en horario de 10.00 a 22.00 horas, de luns a domingo. O obxectivo do Concello é dotar ao núcleo de Boiro de “máis espazo para estacionar e para fomentar o comercio local”. O alcalde engadiu que “con esta actuación vanse habilitar 60 prazas de aparcamento no centro de Boiro, ademais de cumprir cunha demanda histórica da veciñanza”.
O parking público foi, como dixemos, obxecto de reparacións recentes e tarefas de acondicionamento. “Retirouse todo o material de obra de exterior para ganar aquí espazo, facer limpeza e pintado de todo o inmóbeis e reparar deterioros puntuais” afirmou o concelleiro de Obras, Luís Ruíz.
