O Concello de Ribeira vén de sacar a licitación a xestión da Escola Infantil Municipal para o curso 2020-2021, con posibilidade de prórroga por outros tres (2021-2022, 2022-2023 e 2023-2024). O Goberno local explica que o orzamento base de licitación ascende a 397.716,16 euros (IVE exento) e que o prezo do contrato ten unha parte fixa (que se percibirá directamente polo Concello, por un importe de 378.529,16 euros) e unha parte suxeita a variacións, “que se percibirá directamente das persoas usuarias do servizo en concepto de matrículas e material escolar”.
O Executivo ribeirense engadiu que oprocedemento de contratación é aberto e que os parámetros de adxudicación e ponderación inclúen tanto “criterios de valoración do proxecto presentado (proxecto educativo, xestión organizativa, melloras para a conciliación do persoal, melloras do proxecto educativo socio ambiental, plan de acción para pais/nais e titores) como criterios avaliábeis de forma automática (prezo ofertado, estar en posesión de determinados certificados de xestión de calidade e de xestión ambiental, implantación do Plan de Igualdade)”.
As entidades interesadas dispoñen ata o 31 de agosto á media noite para formular as súas propostas. Débeno facer a través do Sistema de Licitación Electrónica da Xunta de Galicia (SILEX).
