O Concello de Boiro vén de pór a punto o Centro Social de Abanqueiro co fin de poñer a disposición da veciñanza as mellores instalacións e equipamentos posíbeis. Os traballos foron impulsados polos departamentos de Cultura, Obras e Xuventude, que colaboraron durante o pasado mes de xuño para recuperar o centro, que viña carrexando unha serie de problemas construtivos que provocaba “un mal estado xeral do inmóbel”, sinalaron, engadindo que o investimento realizado centrouse en cousas como eliminar as entradas de auga do teitume, na erradicación de humidades e nos pintados, en traballos de fontanería e albanelaría e no mantemento xeral interior e exterior.
A maiores, realizouse unha organización xeral das actividades que se realizaban no interior, co fin de facilitar o uso das instalacións por parte da veciñanza. Por exemplo, acondicionouse unha sala do andar baixo para evitar que as participantes nos cursos de costura, moitas delas persoas de idade avanzada, tiveran que subir unhas escaleiras “cando había unha aula na propia planta baixa para a realización do cursos”.
Ademais da organización xeral realizouse unha catalogación e mellora na totalidade da biblioteca e aula de estudo: arranxáronse os andeis, colocáronse libros que estaban acumulados en caixas e creouse un espazo infantil.
O alcalde de Boiro agradeceu o labor de todas as persoas que participaron, quen “conseguiron recuperar un edificio con traballo, enerxía e ilusión sen custe; co que agora poñemos a disposición dos veciños un lugar para reunirse, formarse, estudar e ler”.
