O Concello de Boiro abriu un proceso selectivo para a contratación temporal de persoal de limpeza de praias durante a tempada estival. En total o procedemento dará traballo a quince peóns (8 para a limpeza de praias a media xornada, 7 para a limpeza a xornada completa), que van realizar as tarefas de mantemento dos areais. A presentación de solicitudes pode facerse no Rexistro Xeral do Concello de Boiro ata o xoves dia 9 de xullo.
Os contratos vanse formalizar baixo a modalidade contractual laboral temporal mediante un sistema de acceso de concurso-oposición.
O Concello fixo saber que as persoas candidatas teñen que cumprir unha serie de requisitos, como pertencer a calquera dos Estados asinantes do Tratado da Unión Europea e ao Acordo sobre o Espazo Económico Europeo, con coñecementos suficientes de lingua castelá e/ou galega. Os cidadáns estranxeiros teñen que ter permiso de traballo dunha duración mínima de 12 meses e titulación homologada polo Estado, ademais de coñecementos de lingua galega e/ou castelá. As persoas aspirantes deberán acreditar estar en posesión de, como mínimo, titulación de 2º ESO ou equivalente.
As bases están a disposición dos interesados na páxina web do Concello de Boiro ou na portería da Casa Consistorial e as instancias poden presentarse, ata o xoves 9 de xullo, de xeito telemático a través da sede electrónica ou no Rexistro Xeral do Concello de Boiro, de luns a venres en horario de 9.00 a 13.30 horas.