Dun tempo a esta parte as praias son algo máis que area: tamén semellan ter, por desgraza, as cabichas dos cigarros entre os seus principais elementos constitutivos. O Concello da Pobra da Caramiñal vén de activar un campaña esta verán para loitar contra a práctica que teñen algúns fumadores de depositalas na praia, malia as moitas consecuencias negativas que ten este xesto, que é unha prolongación do xesto moi estendido de guindalas na rúa ou, peor aínda, nos sumidoiros (que é o camiño directo para chegar aos ríos e logo ao mar).
O Concello da Pobra, que este domingo pola tarde repartiu cinceiros portátiles nas praias da Ila, Lombiña e a Corna, ten o obxectivo de reducir a presenza dos filtros do tabaco nos areais por moitos e variados motivos, comezando polo máis evidente: contaminan a auga salgada e a auga doce. Ademais, depositalas onde mellor nos veña é un acto que vai directamente en contra de todas as medidas de seguridade sanitaria que a cidadanía e as administracións están a levar a cabo con gran esforzo.
No comunicado emitido para informar desta iniciativa, o Goberno local lembra outros efectos perniciosos das cabichas:
· Cada cabicha pode contaminar entre 8 e 10 litros de auga do mar e ata 50 litros se se trata de auga doce.
· Son un residuo altamente contaminante pola súa composición.
· Os raios ultravioletas do Sol poden fragmentar o filtro en pezas máis pequenas, pero o material de orixe non é biodegradábel.
· Reteñen numerosas substancias como cadmio, arsénico, nicotina, tolueno, e outros compoñentes como o metanol, ácido acético, amoníaco, ácido esteárico e alcatrán.
· Son un residuo persistente no tempo: o informe de 2017 da ONG Ocean Conservancy indica que as cabichas supoñen o 13% do número total de desperdicios recollidos na súa campaña mundial.
· Poden viaxar miles de quilómetros e contaminar diferentes ecosistemas, incluídos os océanos.
· Diversos estudos mostran que o seu efecto contaminante pode durar entre 7 e 12 anos, e incluso algúns estudos afirman que poden chegar ata os 25 anos.
· Son un residuo difícil de retirar nas praias tanto con limpeza mecanizada coma manual.
· Moitos animais confúndenas con comida, e morren ou enferman por atragoamento ou toxicidade.
· Dan moi má imaxe do lugar onde se atopan, pois a calquera persoa lle gustan as praias limpas.
· Ás nenas e nenos chámanlle-la atención e métenas na boca.
