O alcalde de Noia, Santiago Freire, visitou este luns 27 as obras de acondicionamento e ampliación da lonxa de Testal, co fin de supervisar o desenvolvemento dos traballos. Segundo indicou, “estes seguen a bo ritmo”, o que indica que as instalacións estarán prontas para ser utilizadas co inicio da campaña de marisqueo. Os labores están a ser desenvolvidos pola empresa Tragsa e conta cun orzamento de case 600.000 euros.
Segundo engadiu o rexedor, o acondicionamento da lonxa de Testal “é unha actuación moi necesaria que vai redundar na mellora do traballo de mariscadoras e mariscadores, xa que corrixe algunhas eivas do edificio actual en cuestión de impermeabilidade, illamento térmico e distribución de espazos”.
O alcalde, que salientou o feito de que as novas instalacións veñan concibidas para mellorar a visualización das poxas, engadiu que as obras inclúen a reforma da cuberta e das paredes do inmóbel, con elementos destinados a mellorar a súa impermeabilidade e illamento térmico. Tamén se contempla a instalación dunhas bancadas para que os turistas poidan observar os procesos de clasificación, transformación e poxas do berberecho noiés.
Ata o momento, Tragsa xa ten realizado traballos de saneamento e eliminación de humidades nas instalacións, así como tarefas de mellora do illamento térmico e do alumeado e redistribución de espazos.
