O programa de conciliación familiar Lousame Concilia vén de pechar a primeira das súas quendas, a correspondente ao mes de xullo, na que participaron vinte nenos e nenas de entre 3 e 12 anos. Foi, en palabras do Concello, unha semana na que os pequenos e pequenas desfrutaron de sesións de zumba, de maxia, dun xogo da oca de tamaño real, de xogos de auga e dunha sesión especial de reciclaxe.
O patio cuberto do CPI Cernadas de Castro foi novamente o eixe das actividades realizadas, entre as que se incluíu a adaptación do clásico xogo do pano de man con chorros de auga para combater a forte calor destas xornadas. O programa tamén incluíu un obradoiro (o obradoiro Segunda Vida) no que as crianzas aprenderon reciclar distintos obxectos de uso cotiá. Nesta ocasión, aprenderon a achegar novos usos para pequenas botellas de plástico, que engalanaron e levaron para as úas casas.
Lousame Concilia Verán é un programa organizado pola Concellería de Igualdade do Concello, que conta coa colaboración da Secretaría Xeral de Igualdade da Xunta de Galicia e do Fondo Social Europeo. O luns dará comezo a segunda quenda do programa, na que participan outros 20 nenos e nenas de entre 3 e 12 anos, a maioría xa participantes na quenda de xullo.