Guadi Galego, unha das artistas galegas que máis e mellor sabe reivindicar e exportar e dignificar a alma musical da nosa terra, vai estar os días vindeiros en Castiñeiras (Ribeira), na contorna da antiga Fábrica de Salgadura que culmina a praia do Castro, para ofrecer o terceiro concerto confirmado do ciclo Paisaxes Sonoras que organiza a Mancomunidade Barbanza-Arousa, logo das confirmacións de Carlos Blanco (no Pazo de Rianxiño) e The Soul Brothers (en punta Cabío, Pobra). A cita con Guadi Galego será o 29 de agosto. Coa participación da artista de Cedeira, que mantén fortes ligazóns coa cultura do mar, reforzarase e amplificarase o obxectivo primordial de Paisaxes Sonoras: ir á orixe da identidade e do patrimonio dos concellos de Barbanza-Arousa.
Como dixemos, o concerto terá lugar na antiga Fábrica de Salgadura de Castiñeiras, datada a principios do século XIX e enmarcada dentro da área de esparexemento de punta do Castro. Enclavada en zona de dominio público marítimo-terrestre, preside a praia do Castro e ofrece unhas vistas privilexiadas á entrada da ría e a illa de Sálvora.
A artista: Guadi Galego
Premio Martín Códax da Música á Mellor Artista na categoría de Canción de Autor, é unha das artistas máis relevantes da escena galega actual, froito dunha andaina musical que comezou sendo moi nova. Tras tres discos en solitario Benzón, Lúas de outubro e agosto e O mundo está parado, chega Immersión, unha re-lectura musical e lingüística das súas obras máis recentes da que adiantou unha versión de Cedeira na que colabora Iván Ferreiro. Actualmente atópase mergullada na xira de presentación do seu último traballo, aclamado por crítica e público. Nesta ocasión, Guadi ofrecerá un concerto especial a dúo, adaptado a nova realidade e ao aforamento vixente.
O aforamento
Para cada sesión de Paisaxes Sonoras habilitarase un aforamento máximo de 50 persoas, constituído por dúas ducias de entradas duplas, reservadas para unidades familiares ou de convivencia, e 4 entradas individuais. A mancomunidade explica que a exclusividade do aforamento baséase tanto nas medidas de seguridade sanitaria contempladas nesta etapa post-COVID-19 como “no respecto á integridade das localizacións escollidas”. O obxectivo último é achegar “unha experiencia única que conxugue o desfrute do entorno e da proposta artística”.
As entradas saen á venda a través de Eventbrite, a un prezo de 6 euros + gastos as dobres e 3 euros + gastos as individuais.
A Pobra: música de raíces en punta Cabío
Dous dos máis grandes músicos del soul e rock nacional, Juan Zelada e Julián Maeso, únense por primeira vez no proxecto The Soul Brothers no que interpretarán temas propios e versións de grandes clásicos “nun espectáculo único e especial”, explica a Mancomunidade. A cita na Pobra do Caramiñal, na fermosa contorna da praia de Cabío, é o 8 de agosto. O espectáculo comezará ás 20.00 horas, e as portas abrirán ás 19.00 horas.
Rianxo: O hórreo do Pazo Rianxiño
Carlos Blanco foi o protagonista da segunda cita confirmada (o 15 de agosto) cunha actuación baixo a sombra do Hórreo de Rianxo (no Pazo de Rianxiño), unha senlleira construción tradicional que é a segunda en importancia do concello dentro das súas características, logo do de Araño, tendo como particularidade a súa cuberta de granito a dúas augas. A apertura de portas é ás 19.00 horas.
Máis programación
A cita restante será o 22 de agosto en Boiro cun cartel aínda pendente por confirmar.