A Consellería do Medio Rural informa de que o lume forestal rexistrado no concello da Pobra do Caramiñal, parroquia de Lesón, quedou estabilizado ás 14,53 h deste mediodía. O incendio comezou ás 03,38 h. desta madrugada, polo que todo indica que foi intencionado.
Segundo as últimas estimacións, o lume afecta unha superficie de arredor de 60 hectáreas. No seu control levan traballado 5 axentes, 6 brigadas, 7 motobombas, 1 pa, 4 avións e 7 helicópteros.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.
Nas últimas horas, o Ministerio para a Transición Ecolóxica e Reto Demográfico ( MITECO) despregou diversos medios para apoiar á Comunidade Autónoma de Galicia nas tarefas de extinción de tres incendios declarados en Galicia: un na Pobra do Caramiñal (A Coruña); e outros dous, xa controlados, en Quiroga (Lugo) e Santiago de Compostela (A Coruña). Nestes momentos unha Brigada de Reforzo de Incendios Forestais ( BRIF) da base da base de Laza (Ourense) colabora nas tarefas de extinción do incendio da Pobra do Caramiñal. Ademais, están mobilizados dous helicópteros Kamov con capacidade de carga de 4.500 litros provenientes das bases de Ibias (Asturias) e Plasencia do Monte (Huesca); e un Avión de Coordinación e Observación ( ACO), utilizado en tarefas de vixilancia, transmisión de imaxes e observación do incendio. Desprazouse desde o aeroporto de León. Este foco tamén contou co apoio de tres avións anfibios Canadair de 5.500 litros de capacidade, procedentes das bases de Lacabolla (A Coruña) e Matacán (Salamanca), que xa foron desmovilizados.
