O noso compañeiro e colaborador José Manuel Pena vén de pór no noso coñecemento e no dos lectores un delito medioambiental perpetrado na contorna da praia da Coroso, en Ribeira, concretamente nunha das zonas de máis importancia ecolóxica desta paraxe natural: as zonas húmidas que comezan onde rematan onde remata a Escola de Náutica e onde conflúen varios regatos que desembocan no que se coñece como o “río Grande”. Pena lémbranos que nesta zona (concretamente na marxe esquerda da pasarela de madeira pola que circulan os camiñantes logo da ponte do río) proliferan os vertidos ilegais procedentes de fosas sépticas.
O noso colaborador xa compartiu o problema ambiental cos axentes do SEPRONA (Servizo de Protección da Natureza), e insta ao instituto armado a intervir de urxencia para “controlar aos posíbeis infractores, que seguramente usan as horas de anonimato da noite para achegarse cos seus vehículos e levar a cabo os vertidos no devandito lugar”.