Xa comezou a conta atrás para o inicio da sexta edición da Carreira pola Diversidade da Asociación Ambar das Persoas con Diversidade Funcional. A proba será este domingo 19 de xullo, coa gran particularidade, este ano, de que se vai levar a cabo de maneira virtual a través de Galitimin, co fin de achegar a máxima seguridade sanitaria a todas e todos os participantes.
“Aínda que a práctica deportiva e as carreiras populares víronse freadas pola COVID-19”, explican dende a asociación, “Ambar quere seguir promovendo o deporte inclusivo dun modo seguro, a través da modalidade virtual”. O obxectivo último da proba non é outro que “celebrar a accesibilidade en cada concello, vila, e parroquia creando rutas que non limiten a práctica deportiva nas nosas comunidades”.
A proba poderá desenvolverse ao longo de todo o día 19. Cada participante escollerá a ruta de 5 km na súa vila, compartíndoa ao rematar e incluíndo as barreiras de accesibilidade que atopou ao realizala.
As modalidades de inscrición son as seguintes:
• Modalidade 5.000 m Zapatilla
• Modalidade 5.000 m Hand Bike
• Modalidade 5.000 m Cadeira de Atletismo
• Modalidade Andaina (menos de 5.000 m)
A proba poderá desenvolverse de maneira individual, en familia ou en equipo. respectando sempre as indicacións das autoridades sanitarias. Haberá trofeos conmemorativos ao equipo, a organización e a familia máis numerosos, así como ao equipo máis inclusivo. Segundo informa Ambar, tamén se concederá unha mención especial para o concello con máis rutas rexistradas.
Para participar tan só hai que seguir estes paso:
1. Inscribirse en Galitiming, o prazo manterase aberto ata o propio día da carreira.
2. Elixir unha ruta, “canto máis accesíbel mellor”.
3. Rexistrar as zancadas, a través da aplicación móbil que se desexe.
4. Compartir, para valorar a accesibilidade, cada persoa participante terá que cubrir unha breve enquisa e formulario en asociacionambar.org coa ruta realizada.
Dorsal 0
Se hai algunha circunstancia que impida a participación na carreira, está aberta na web de Galitiming a opción de colaborar co dorsal 0 sen límite de cota. A recadación obtida será destinada á adquisición de material para a prevención do contaxio por COVID-19, para as persoas con diversidade intelectual.
