Regresa o programa O Lixo Dende O Teu Concello, impulsado pola asociación ecoloxista ADEGA e o Complexo Medioambiental da Mancomunidade da Serra do Barbanza. Trátase dunha iniciativa para achegar aos concellos e a cidadanía contidos e actividades de educación ambiental, con charlas e obradoiros destinados a promover actitudes de respecto e coidado da contorna e de sustentabilidade. Outro dos obxectivos do programa é subministrar á xente medidas para reducir o plástico nas súas vidas e para a correcta reciclaxe dos embalaxes.
A iniciativa ponse a disposición dos concellos de Brión, Lousame, Noia, Porto do Son, Muros, Ames, Pontecesures, Carnota e Rois.
O programa ofrece un total de 11 actividades predefinidas que estarán acompañadas de materiais de
consulta sobre a grave problemática do lixo e as posíbeis solucións. Poderanse acoller a elas tanto os Concellos como os centros de ensino, asociacións de veciños/as, culturais, etc., da Mancomunidade do Barbanza.
ADEGA salienta a flexibilidade do programa (que pode adaptarse ás situacións particulares de cada centro ou asociación) e máis a metodoloxía activa e participativa da que fai gala, coa que se pretende achegar a temática dos residuos a todos os ámbitos da sociedade, “para que esta perciba as implicacións sociais, naturais e económicas do lixo”.
Os concellos e outras entidades da Mancomunidade da Serra do Barbanza que queiran desenvolver algunhas destas actividades ou realizar algunha outra acción relacionada coa xestión dos residuos sólidos urbanos na súa bisbarra deben contactar con ADEGA a través do correo: residuos@adega.gal.
