Lousame Concilia, o programa impulsado no concello barbanzán para facilitar a compatibilidade do lecer estival da rapazada e a actividade laboral dos maiores da casa, está a encher de ciencia e experimentos o termo municipal, sacando a investigadora e o investigador que levan dentro as nenas e os nenos de entre 3 e 12 anos.
As instalacións do CPI Cernadas de Castro acolleron nas últimas xornadas unha serie de xogos de maxia, traballos manuais e experimentos científicos sinxelos e divertidos para a rapazada, como por exemplo o dos “flocos de millo saltaríns”. Participa unha vintena de nenas e nenos.
A maiores das actividades devanditas, o programa tamén inclúe xogos de auga, xogos populares e sesións de cinema.
Lousame Concilia Verán está organizado pola Concellería de Igualdade do Concello de Lousame, que conta coa colaboración da Secretaría Xeral de Igualdade da Xunta de Galicia e do Fondo Social Europeo.
