A praia de Coroso xa luce bandeira azul. O alcalde de Ribeira Manuel Ruiz e o concelleiro de Turismo Ramón Doval procederon a izar este distintivo, que ondea moi preto do posto de socorristas.
Precisamente foron as dificultades xeralizadas á hora de atopar un número de socorristas suficiente as que levaron ao Executivo —explicou o alcalde— a renunciar durante varios anos a solicitar esta enseña para os principais areais do municipio, pois se antes era relativamente sinxelo contratar uns 50 efectivos agora escasamente se pode cubrir a metade.
Non obstante, o Concello decidiu este ano solicitar a bandeira para o seu areal urbano máis emblemático e frecuentado a petición da asociación local de empresarios, presente no acto por medio de Juan Rey. O rexedor municipal expresou a súa confianza en poder solicitar a enseña para outras praias de Ribeira unha vez se resolvan as dificultades á hora de atopar socorristas bastantes.
Pola súa parte, Ramón Doval quixo poñer en valor a gran oferta de areais existentes no noso termo municipal, que o fan o que máis quilómetros de praia ten na provincia coruñesa.
