A Pobra achega unha decena de espectáculos circenses e humorísticos no Cantón da Leña, os meses de xullo e agosto

13 Xullo 2020

O Concello da Pobra do Caramiñal compartiu con nós e cos nosos lectores a axenda final de actividades circenses e teatrais para este verán no termo municipal, un programa (Verán Cultural) que destaca pola reivindicación sen fisuras do humor e do talento pero, tamén, por incluír unha manchea de citas de formato pequeno para, por unha banda, manter acesa a chama da cultura e a creatividade e, pola outra, garantir ao cen por cen a seguridade dos asistentes e dos participantes.

A axenda de actividades, unha decena de espectáculos circenses e humorísticos, comeza este 14 de xullo, da man de Duende Circo, coa representación de Pallaso total. As citas serán todas elas no Cantón da Leña ás 20.30 horas. Veñen da man do Concello da Pobra do Caramiñal e a Deputación da Coruña.

A continuación achegamos o programa tal e como nos chegou:

14 xullo Duende Circo. Pallaso total é a creación de Víctor Cantero, artista multidisciplinar. Humor, malabares, música e maxia, son algúns dos ingredientes deste explosivo cóctel.

21 xullo Compañía Mónica Paradela. Monitoleando. Moni Mundana quere achegar a espectacularidade do circo ás rúas, nun espectáculo para todas as idades que mistura o clown, a acrobacia aérea, os números de lume, os malabares, a percusión, a danza africana e a participación directa do público

28 xullo Vueltos de Rosca. Lila Star. Beatriz Rubio criada no seo dunha familia de acróbatas de circo clásico leva á escena un “especta-culazo” con técnicas de circo: Acrobacia, equilibrio de mans, rola-bola, clown

30 xullo Charo Pita. A familia papaventos. Trátase dun traballo de Charo Pita cos músicos María Faltri e Jorge Juncal no que interpretan cancións en formato trío. Esas cancións forman parte do libro O país do vento publicado por Charo Pita coa editorial Galaxia.

4 agosto SU.MA. Ikigai. Neste espectáculo de danza-circo dirixido por Gonçalo Guerreiro (Elefante Elegante), dous personaxes, Sue Moreno e Maria Move, crean mundos de fantasía. Xogo e imaxinación, acrobacia aérea e voz cantada en directo, son os ingredientes deste espectáculo.

6 agosto MadCompass. Os limpabotas. Nino e Mambrú. MadCompass é unha nova compañía que reúne artistas de Italia, Francia e Galicia. Un grupo de creadores que veñen do teatro físico, o circo, a música, a danza e os mundos da máscara e o monicreque. Os limpabotas é un espectáculo onde a acrobacia, a esgrima, o mimo e a improvisación co público converxen nunha obra de público familiar.

11 agosto Inveti Teatro. A gran viaxe. Trátase dun espectáculo de rúa divertido e visual que conta cun fantástico vehículo espacial composto por un antigo 600 e un propulsor remolcado.

13 agosto MUU. Cruch. A compañía MUU nace da colaboración entre As Sircópatas e Circo Chosco. Neste espectáculo de novo circo Daniel Blanco e Óscar Páez son dous superheroes dispostos sempre a axudar e que nos farán rir cos seus saltos mortais, cos golpes e caídas, malabares, clown. Un espectáculo fresco e divertido para toda a familia

18 agosto Peter Punk Pallaso. Chungatrona. Neste espectáculo veremos unha aloucada entrada en escena coa Testarrosa, o miniciclo de Peter Punk. Números de maxia coa colaboración do público. E como colofón, un final único no mundo: A Chungatrona!! Un aparello pensado por un pallaso, que manterá ao público en tensión ata que… algún incauto resulte totalmente mollado e a cara cuberta de tarta. Todo isto, para desatar a risa, a diversión e a loucura de todo o público menores e maiores.

Outros artigos

Eliminado un punto de vertido de augas residuais na Pobra

Augas de Galicia (Xunta) contribuíu a eliminar un punto de vertido de augas residuais de carácter municipal na parroquia de Santa María A Antiga, no concello da Pobra do Caramiñal. O persoal do Programa de Control de Vertidos constatou esta anomalía no transcurso dos...

+

Publicidade

Revista en papel

Opinión