Haberá que agardar tempos mellores para desfrutar das grandes celebracións da nosa comarca. Mentres tanto e ante a imposibilidade de garantir a seguridade requirida para cidadáns e visitantes, é o intre de pór en práctica medidas que acouguen o noso espírito festeiro, que xa haberá ocasión para darlle renda solta. Este mércores 15 a organización dunha das celebracións que máis adeptos ten na nosa contorna (e máis alá), a Festa Hortera de Porto do Son, emitiu un comunicado oficial no que se informa da cancelación oficial do evento e que se pode resumir deste xeito: “É o momento de ser responsábeis. Estaremos de volta o vindeiro ano máis fortes que nunca”.
No comunicado lémbrase a complexa situación pola que estamos a pasar (un intre que non resulta o máis axeitado “para realizar grandes eventos”) e aprovéitase para poñer o foco nos moitos elementos que atesoura Porto do Son para seguir visitándoo, malia a cancelación da devandita festa: “Non queremos deixar de recordarvos as marabillas que podedes atopar en Porto do Son, e que agora os nosos comercios e hostalería nos van precisar máis que nunca, pois son a base do financiamento da maioría das festas que teñen lugar no noso concello, é o momento de apoialos. Seguiremos traballando de cara á vindeira edición. Longa vida á Festa Hortera”.