A Oficina de Turismo do Concello de Boiro retoma esta fin de semana a súa actividade, dando servizo a visitantes en horario (até o 9 de xullo) de 9.00 a 14.00 horas e polas tardes de 17.00 a 20.00 horas (os sábados e domingos de 11.00 a 14.00 e de 17.00 a 19.30 horas). O horario, dende o 10 de xullo até o 13 de setembro, pasará a ser de 8.30 a 14.30 horas e pola tarde de 17.00 a 20.30 horas. Os sábados e domingos deste segundo período a oficina estará aberta de 10.30 a 14.00 horas e de 17.00 a 20.00 horas. O servizo, como lembraremos, interrompeuse en marzo por mor da COVID-19, e como unha medida máis destinada a garantir a seguridade sanitaria no concello. A súa reactivación forma parte dos traballos levados a cabo polo Goberno local para restablecer todos os servizos que se paralizaron pola emerxencia sanitaria.
A Oficina de Turismo está equipada con todas as medidas de seguridade e protección, delimitando as zonas de entrada e saída, as zonas de agarda mantendo as distancias de seguridade, dispensadores de xel hidroalcólico e máis biombos de protección. Retiráronse tamén os folletos e guías con información turística dos expositores, para evitar que sexan manipulados, e habilitáronse códigos QR que as persoas usuarias poden escanear para ver no seu dispositivo móbil a información na que están interesados, en varias linguas, a través da web www.boiroturismo.gal.
