Apenas 48 horas para o estreno en España na plataforma FILMIN da película ‘A illa das mentiras’, ópera prima de Paula Cons, e coñecemos que a película participará na 23ª edición do Festival Internacional de Cinema de Shanghái ( SIFF), un dos festivais máis importantes de Asia e o único festival de China de clase A.
Será na sección oficial “ Golden Globet Award” do certame. Trátase do primeiro festival de clase A que se celebra fisicamente tras a pandemia. O festival adoita celebrarse en xuño, pero a crise do COVID-19 obrigou a pospoñelo e dará comezo o próximo 25 de xullo, prolongándose ata o 2 de agosto. Un día antes, o 24 de xullo, a película estrearase na plataforma Filmin. ‘A illa das mentiras’ está dirixida por Paula Cons e protagonizada por Nerea Barros Dario, Aitor Luna, Vitoria Teijeiro e Ana Oca.
A película arranca no afundimento do buque “Santa Isabel” fronte ás costas da illa de Sálvora no concello de Ribeira en 1921, aínda que non é a historia do naufraxio se non un thriller novelado. A madrugada do 2 de xaneiro de 1921, o vapor-correo, con destino Buenos Aires e 266 persoas a bordo, afúndese fronte á costa da illa de Sálvora morrendo 213 persoas. A falta de homes na illa tres mulleres María ( Nerea Barros), Josefa (Vitoria Teijeiro) e Cipriana (Ana Oca), deciden ir ao rescate salvando a varias ducias de persoas, un acto heroico que pagarán moi caro.
Tras estes feitos, un xornalista arxentino, León (Darío Grandinetti), acode a Sálvora para cubrir a noticia do naufraxio. Aos poucos irá descubrindo que esa noite producíronse demasiadas casualidades na illa, chegando mesmo a sospeitar que o naufraxio puido ser provocado. Mentres tanto, xa nada será igual. O naufraxio sacudirá e cambiará para sempre a vida da illa. ‘A illa das mentiras’ é unha coprodución entre as españolas Agallas Films e Historias do Tío Luís, coa arxentina Aleph Cinema e a portuguesa Take 2000.
Conta coa participación de TVG, RTVE e ETB, e co apoio de AGADIC, Gobierno Vasco, ICAA, INCAA arxentino, ICA portugues e o Programa Ibermedia. Da súa distribución nacional e internacional ocúpase Filmax. Co título de ‘O Santa Isabel’ a película recibiu o ano 2018 un total de 400.000 euros na convocatoria de axudas selectivas do ICAA. Así mesmo, este proxecto foi seleccionado e finalista no Foro EGEDA/ FIPCA celebrado no marco dos Premios Platino, e para participar no SantiagoLab Cruzando Fronteiras no marco do SANFIC, Festival de Cinema de Santiago de Chile.
A película está prevista se estrene en cines a partir de setembro e inicialmente a gala de estreno está prevista en Ribeira.
