A Real e Ilustre Cofradía da Dorna lembra dende o seu Facebook que este sábado 18 volveremos ter unha oportunidade para facernos cos suadoiros dorneiros da edición deste ano, segundo recordan “un artigo de gran luxo que ten a capacidade para marcar unha distinción social entre a sociedade da comarca”. Para esta segunda xornada da venda, que segue á celebrada hai uns días na praza da España, habilitarase o posto de venda na avenida do Malecón, nas inmediacións do antigo palco de pedra. Desde as 10.33 horas, con “puntualidade inglesa”, as persoas interesadas poderán achegarse e adquirir a devandita prenda oficial da selebrasión mariñeiro-festiva de Ribeira.
O programa de actividades deste sábado compleméntase cunha singradura pola ría de Arousa que forma parte dunha ruta de seis xeiras con pernoctación incluída no mar e acompañados os tripulados (tres “aguerridos dorneiros”) dun kit dorneiro básico de supervivencia. Os navegantes serán Ramón Silva, Rubén Cores e Manuel o da Ghregha e a embarcación tradicional da que botarán man será a Dorna Nai da Cofradía. A previsión é “faser noite en Rianxo” e remontar, na xeira seguinte, o río Ulla até Poncesesures. Vilagarcía, Vilanova, Cambados e O Grove serán os vindeiros portos-cama ata por rumbo ao porto base de Ribeira.
