Grazas á súa aposta pola seguridade e polas medidas que garantisen nesta emerxencia sanitaria as mellores condicións sanitarias para empresas e clientes, a Asociación Boirense de Empresarios vén de acadar un importante recoñecemento: o selo Turismo Responsábel expedido pola Secretaría de Estado para o Turismo do Goberno central, que “acredita o compromiso da ABE coa aplicación das directrices e recomendacións contidas na guía de medidas para a redución do contaxio pola COVID”.
Segundo informa a entidade boirense, esta distinción súmase ao selo de Comercio Seguro da Xunta (tras acadar no diagnóstico realizado un nivel de preparación moi elevado en relación coas empresas do sector) e ao recoñecemento Compra do Noso do Clúster da Comunicación (un distintivo xurdido en plena crise económica e sanitaria para fomentar o consumo de produtos e servizos galegos co fin de apoiar a reactivación dos sectores produtivos).
Responsible Tourism
A Secretaría de Estado de Turismo creou o distintivo Responsible Tourism para enxalzar aqueles establecementos e entidades turísticas que fan un esforzo por crear un entorno seguro non só para os turistas senón para os seus propios traballadores e os residentes, aplicando as directrices e recomendacións contidas nas guías de medidas para a redución do contaxio polo coronavirus SARS-CoV-2.
A ABE presta o servizo de solicitar o devandito selo, de xeito gratuíto, a todos os seus socios do sector turístico. A asociación encárgase de tódolos trámites incluso, se o desexan, de imprimir o mesmo para a súa colocación nos locais.
