O Concello de Rianxo quere escoitar as necesidades e as propostas das empresas locais e establecer propostas de colaboración para mitigar as graves consecuencias que está a ter a COVID-19 nunha chea de sectores, especialmente nos ámbitos da hostalería, o turismo e o pequeno comercio, entre outros. Con este obxectivo iniciou un ciclo de faladoiros vía Jitsi (a ferramenta libre para vídeo-conferencias) con persoas autónomas ou que rexenten un pequeno negocio en Rianxo. As reunións, que xa comezaron este mes de xuño, estanse a desenvolver por sectores de actividade. Dende a web do Concello e dende o seu Facebook irase informando puntualmente das vindeiras citas online.
Na primeira das xuntanzas previstas participaron a edil de Urbanismo, Área de Rehabilitación, Desenvolvemento Local, Comercio e Emprego, Maricarmen Figueira, e o orientador laboral del Concello, Marcos Alejandro.
As sesións, que como dixemos lévanse a cabo por vídeo-conferencia (a través da ferramenta libre Jitsi) buscan “analizar a actual situación provocada pola COVID-19, escoitar necesidades e valorar propostas de colaboración por parte do Concello”.
O Goberno local, que ten canle propia en Jitsi a través da cal canalizar estas comunicacións co tecido produtivo rianxeiro, indica, que o acceso á plataforma poderá facerse nas vindeiras sesións a través de dispositivo móbil (teléfono ou tableta) ou computador persoal (portátil ou sobremesa). Na páxina do Concello indícanse polo miúdo os procedementos requiridos para tirar proveito da dita ferramenta.
