Os remeiros do Club de Remo da Pobra volven ao mar

Este luns 15 de xuño celebrouse na Pobra do Caramiñal un acontecemento deportivo histórico: o regreso ao mar da traiñeira masculina do Club de Remo local. A embarcación foi carrexada polos remeiros pobrenses dende as instalacións do club, por primeira vez logo de tres meses adestrando cada un nas súas casas (por mor da pandemia e o Estado de Alarma) e tentando exercitarse, durante ese tempo, da maneira máis fiel posíbel ao que sería o traballo nas bancadas da traíña.

Segundo informou o Club, o deste luns foi un adestramento ”light”, xa que “despois de tanto tempo sen facelo, corremos o risco de lesionarnos, e agora mesmo unha lesión sería o peor que nos pode pasar”. A previsión, engadiron, é “ir subindo a intensidade do adestramento de maneira paulatina”.

Tamén lembraron que o deste 15 de xuño foi o primeiro día en que a Xunta permitiu aos integrantes do club saír en grupo e vogar no mar, ao igual que o resto das entidades deportivas de remo da nosa terra.

“Para nós, o feito de volver remar en condicións normais é moi importante, porque unha gran parte dos integrantes do noso equipo son remeiros novos ou que levan pouco tempo, e o que máis necesitamos son horas de adestramento no mar, para pulir ben a técnica e unificar o bloque de remada”, explicaron, poñendo o foco na importancia deste mes de xuño que afronta a súa terceira semana, con vistas ao comezo da Liga Galega de Traiñeiras B que comeza o 16 de xullo. “Despois de estar un ano fóra da competición, queremos volver con todo”, sinalaron, engadindo que o equipo feminino de traiñeiras tamén volverá adestrar, aínda que “sen tanta urxencia como o masculino, posto que non participan na Liga”. Farano este sábado ás 18:00 horas.