O Goberno galego e os concellos colaborarán arreo para garantir a seguridade sanitaria nas praias fronte á COVID-19. Así o deu a coñecer este xoves na Illa de Arousa o vicepresidente da Xunta, Alfonso Rueda, que dixo que o apoio da Administración autonómica ás entidades locais collerá corpo no co-financiamento de persoal para garantir a vixilancia e a limpeza nos areais e de elementos para sinalizar, balizar e desinfectar as praias e as súas instalacións comúns.
Así o destacou esta mañá na praia do Carreirón da Illa de Arousa, onde estivo acompañado pola directora xeral de Administración Local, Marta Fernández-Tapias, o delegado territorial da Xunta en Pontevedra, José Manuel Cores Tourís, e o alcalde Carlos Iglesias.
Segundo explicou o vicepresidente, a Administración autonómica colaborará a través de acordos con pequenos e medianos concellos co obxectivo de reforzar o persoal para “colaborar cos efectivos de socorrismo que xa teñen unhas tarefas concretas que deben seguir realizando”.
Con esta “medida complementaria”, sinalou Rueda, contribuírase a contar con máis persoal que colabore en actuacións de organización e vixilancia de accesos, control de aforamentos ou da permanencia nos areais, así como traballos de limpeza.
Ademais, engadiu que poderase colaborar na adquisición de medios para a limpeza das praias e das súas instalacións comúns ou da recollida de residuos “que supoñen un gasto adicional cos condicionantes actuais debido ao coronavirus” como “elementos de sinalización, balizamento ou material de limpeza e desinfección”.
