O Concello de Boiro, xunto coa Fundación Deportivo, e a colaboración de entidades locais, presentaron este xoves 25 a edición boirense do Depor Campus, que se vai celebrar nas instalacións do Campo de Fútbol de Valiño e, a nivel galego, nunha ducia de concellos máis. A edición boirense desenvolverase entre os días 20 e 24 de xullo, cun aforamento limitado de 60 rapaces e rapazas (co obxectivo de garantir a seguridade sanitaria dos participantes).
Á presentación asistiron o tenente de alcalde, Luís Ruíz, o concelleiro de Deportes, Marcos Fajardo, o coordinador de fútbol base do RC Deportivo da Coruña, Pablo Barros, o directivo da EFM, Julio García, e Janvi Cameán, coordinador da EFM.
Segundo fixeron saber, na edición deste ano “vaise seguir un protocolo moi estrito de seguridade e hixiene, coidando que se usen máscaras de protección para o acceso ás instalacións, uso de xeles hidroalcólicos e adaptación dos grupos e actividades”.
O Concello fixo saber que esta actividade serve como “unha xornada de convivencia para os nenos e nenas da comarca e tamén para os adultos e directivos dos clubes que os acompañan”.
No punto de mira está avanzar en “tecnificación deportiva con adestradores de primeiro nivel” e máis impulsar os valores que transmite o deporte.
As inscricións para o Depor Campus de Boiro están xa abertas e poden facerse na web de www.deporcampus.rcdeportivo.es até o vindeiro 16 de xullo.
